అదెందుకో తెలీదు కానీ నేను పుట్టిందీ పెరిగిందీ ఆంధ్రాలో ఐనా నా కుండే కొద్ది మంది ఆప్తమిత్రులు తెలంగాణానుండే. అందులోనూ అందరూ భౌతిక శాస్త్రం చదివిన వారే. సెంట్రల్ యూనివర్శిటీ ఇచ్చిన గోల్డ్ మెడల్ కన్నా అదే యూనివర్శిటీ ఇచ్చిన ఈ గోల్డెన్ మిత్రులు చాలా ప్రభావం చూపారు. ఈ మహాను భావుడు ఒకడు.
అన్నా!! లక్ష రూపాయల నీ కెమేరా ఎవడో కొట్టేశాడన్నా !!
అవునా అన్నా!! దాంట్లో నీ వాల్యుబుల్ డేటా ఏమన్నా ఉందా అన్నా!! అని కూల్ గా అడిగే మిత్రుడు .
25 సంవత్సరాల వయసులో పూనా యూనివర్సిటీ మైదానంలో సత్యసాయి దేవుడా కాదా అని సవాళ్ళు విసురుకుంటూ చేసిన ఆర్గ్యుమెంట్స్ నుండీ నేటి ఎంపీ శృంగారం వరకూ మా వాదోపవాదాలు జరుగుతూనే ఉంటాయి.
అలా ఇండియన్ రెస్టారెంట్కి వెళ్ళి కూర్చున్నాం.
అన్నా! ఈ మధ్య ఆంధ్రాలో జరుగుతున్నవి చూసి చాలా ఆక్రోశం వేస్తోందన్నా దొంగ సర్టిఫికేట్లు,అధికారులే అమాయక ఆడపిల్లల్ని వాడుకోటం ఒక ఐపిఎస్ అంత పబ్లిక్ గా పట్టుబడ్డ వీడియో కనీసం లాబ్ కి పంపకుండా అబద్ధాలు ఆడటం ఇవన్ని చూసి మొద్దుల్లా గంగిరెద్దుల్లా తలూపుతున్న ఈ జానాన్ని ఆలోచించమని కొంచెం ఘాటుగానే పోస్టులు పెడుతున్నా అన్నా,
(అటునుంచీ) అన్నా చికెనా !! మటనా!!
అన్నా! ఇవ్వాళ వినాయక చవితి నేను నాన్వెజ్ తినను. (ఇంత సీరియస్ గా చెప్తుంటే ఫుడ్ గొడవ.. అని మనసులో నేను)
అప్పుడే సలాడ్, సమోసా స్టాటర్స్ తో వచ్చిన బేరర్ ని మావాడు “డూ యూ యావ్ ఉండ్రాళ్ళూ” అని అడుగుతూ ఇచ్చిన లూక్ లో వినాయకుడు వినాయక చవితిరోజు చికెన్ తొనొద్దన్నాడా? అన్న ప్రశ్న ప్రస్ఫుటంగా సమోసాలోకి దింపిన ఫోక్లా గుచ్చుకుంది.
ఫోక్తో వేడి వేడి పొటాటో మషాలాని ఆస్వాదిస్తూ చూడన్నా!! బేసికల్లీ మనిషి జంతువునుంచీ వచ్చాడు. ఆజంతువు పరిణామక్రమంలో సంఘాలుగా ఏర్పడి కొన్ని నియమాలు పెట్టుకున్నాడు. నియమాలు పెట్టుకున్నంత మాత్రాన జంతువు జంతువు కాకుండా పోతుందా? ఆ జంతు స్వభావం అవకాశం దొరికినప్పుడల్లా నేనున్నా అని బయటకివస్తది. కాలం, ప్రకృతి అన్నింటికీ సమాధానం చెప్పేస్తది అన్నా. ఖర్మ అన్నది ఒకటి ఉంటది అన్నా వ్యక్తికైనా రాష్టానికైనా…. ఇంటికేళ్ళి స్వామి(సత్య సాయి) స్పీచెస్ పంపుతా ఎన్ని సార్లు విన్నా కొత్తగా ఉంటదన్నా విను, ప్రస్తుతం ఫుడ్ కుమ్మేద్దాం దా!!
నిప్పుల కుంపటి మీద పాలపొంగుకి నీరు చేరితే…మీగడ వృధాకాదు
Sree Ganesh Thottempudi's Blog 